6uo內蒙農場

一個人喺北角食乜好?

「一個人食飯食乜好?」相信呢個係好多人都諗或者面對嘅問題,好似冇乜奶油一支公去食放題或者鋸扒,於是有人會揀掃街、有人會揀食便利店或者快餐店,甚至有啲人會寧願唔食。但其實一個人食飯又有咩好怕喎?邊個話要一班人先可以食好西?好耐冇同大家介紹一個人嘅飯堂,即刻同大家搵下北角一帶先~

大大隻瑞士雞脾 祥發茶餐小廚

 

呢間茶記一到食飯時間就好多人排隊㗎喇,不過你得一個人食,應該好易就攝到一個位坐低~ 餐牌上有成70幾個配搭揀,多士啦、奄列啦、飯啦等等,揀咩都好,最緊要揀瑞士雞脾,招牌名菜嚟呀!大大隻原隻上,浸住瑞士汁。食雞脾係要用手拎住食先夠風味,平時同朋友一齊可能唔太好意思,要扮斯文用刀叉,自己一個嚟食就冇所謂啦~ 汁夠甜,肉夠滑!

馬拉車仔麵  姨婆瑪麗

 

唔講都唔知,原來呢間餐廳係食馬來西亞車仔麵嘅,一個人搞掂食碗麵,啱晒。主要有三款湯底揀,雞湯、咖喱湯同車仔麵好少有嘅蝦湯。幾濃㗎,都食到啲蝦味。麵底仲有得揀摻摻添,即係油麵加米粉呀,都係出面比較少地方食到嘅。餐牌上有另一道菜叫「辣死你姨媽」,係椰漿飯嚟,啖啖椰香,仲有泡菜、鯷魚等等配菜,幾豐富。

甜酸齋車仔麵  車仔麵之家

 

呢間車仔麵係由灣仔開過嚟嘅,品質都幾有保證。有好多配配料揀呀,鍾意食內臟嘅,豬大腸最出名,爽滑。要索湯勁嘅當然就蘿蔔、豬皮同墨魚腐皮卷嗰啲啦,但要特別介紹一樣餸:甜酸齋!你有幾可見到車仔麵有呢個選擇吖?又幾夾喎,酸甜度適中。BTW,食得辣嘅記得要落佢哋嘅辣醬,舖頭自家秘製,辣度十足。

薑絲豬潤通粉 半島冰室

 

一個人去食半島,就是霸氣!雖然唔係酒店嗰間,但呢間冰室都唔失禮,無論型男定索女餐(佢餐牌真係咁寫)都好受歡迎。一個係茄牛通、一個係薑絲豬潤通,都好係一個人自己食嘅嘢,兩個餐都會配多士炒蛋,隻蛋好滑下。想對自己再好啲嘅,就叫頭等餐啦,係茶記好少有嘅龍蝦湯海蝦球意粉呀,都幾入味。

滋潤湯水   營然

 

新新地嘅小店,主要食餃子嘅,蕃茄豬肉餃呀、芫荽豬肉餃呀咁,有啲少見啲嘅例如沙葛豬肉餃、蟲草花豬肉餃咁,都試得過,沙葛爽口,蟲草花爽彈,兩者嘅口感同味道配落餃子度都幾特別。另外,呢度最好就係有湯飲!一個人開飯都有湯飲,仲要唔係味精湯喎,而係赤小豆粉葛湯、無花果雪梨雪耳燉豬展呢類都幾滋潤嘅湯,即刻冇咁dry啦~